ລົມກັນ

Friday, December 26, 2008

ການດື່ມເຫລົ້າ

ໃນລະຍະເທດສະການ (ບໍ່ແມ່ນຂອງບ້ານເຮົາ) ແບບນີ້ ກໍມີຫລາຍຄົນທີ່ໄປຕາມກະແສ ອັນນີ້ກໍຫ້າມກັນບໍ່ໄດ້ ແຕ່ສິ່ງນຶ່ງທີ່ມານຳເທດສະການ ກໍຄືການສະຫລອງ ເມື່ອມີງານສັງສັນສະຫລອງແລ້ວ ສິ່ງທີ່ຂາດບໍ່ໄດ້ກໍແມ່ນການດື່ມກິນ ດື່ມສິ່ງມຶນເມົາ ຕາມຕົວເລກສະຖິຕິຈາກກົມຕຳຫລວດຈະລາຈອນ ໃນເດືອນ 11 ປີ 2008 ມີອຸບັດຕິເຫດໃນນະຄອນຫລວງທັງຫມົດ 170 ຄັ້ງ ໃນນັ້ນສາເຫດຈາກການດື່ມເຫລົ້່າ ມີເຖິງ 84 ລາຍ ເກືອບເຄິ່ງນຶ່ງເນາະ ແລະໃນລະຍະ ວັນທີ 26/12/07-1/1/08 (ປີໃຫມ່ປີກາຍນີ້) ມີອຸບັດຕິເຫດໃນນະຄອນຫລວງ 77 ຄັ້ງ ສາເຫດຈາກການດື່ມເຫລົ້າມີ 49 ລາຍ ສັງເກດເບິ່ງວ່າໃນລະຍະເທດສະການ ພຽງ 5 ມື້ ມີອຸບັດຕິເຫດເຖິງ 77 ຄັ້ງ.


ອາດຍ້ອນຫຍັງບໍ່ຊາບ ຍ້ອນເຈົ້າຫນ້າທີ່ບໍ່ເຄັ່ງຄັດ ຫລືຍ້ອນຄົນບໍ່ປະຕິບັດ ຫລືຍ້ອນຮ້ານບັນເທີງຫລາຍເກີນໄປ ຫລືຍ້ອນລັດຖະບານບໍ່ເອົາໃຈໃສ່ ຫລືຫຍັງກໍບໍ່ຊາບ ແຕ່ມີຕົວຢ່າງຈາກຕ່າງປະເທດ ທີ່ຢາກໃຫ້ອ່ານນຳກັນ ແລ້ວລອງຄືດເບິ່ງວ່າສາເຫດມາຈາກໃສ່ກັນແທ້.


ຄັດມາຈາກວາລະສານລານຄຳ ສະບັບ 04 ຊື່ບົດຄວາມວ່າ "ຄົນສະວີເດັນກິນເຫລົ້າຢ່າງໃດ"


ມື້ພາໄປລາດຊະອານາຈັກສະວີເດັນ ຫລື ອ່ານຕາມພາສາຝຣັ່ງວ່າ ຊູແອັດ ເພື່ອເບິ່ງວັດທະນະທຳການບໍລິໂພກເຫລົ້າ ຫລືການດື່ມຂອງເຂົາເຈົ້າ.

ປະເທດສະວີເດັນ ຫລາຍຄົນເຄີຍໄດ້ຍິນ ແຕ່ບໍ່ຮູ້ວ່າເປັນຫຍັງປະເທດນີ້ຈຶ່ງມີຊື່ສຽງ ສະວີເດັນເປັນປະເທດທີ່ຮັ່ງມີປະເທດນຶ່ງ ທີ່ມີເນື້ອທີ່ພຽງແຕ່

449,964 km2 ແລະມີປະຊາກອນ ເກົ້າລ້ານປາຍຄົນເທົ່ານັ້ນ ເຊິ່ງຖືວ່າຫນ້ອຍຖ້າທຽບໃສ່ບັນດາປະເທດໃນເອີຣົບທັງຫລາຍ. ປະເທດສະວີເດັນເຄີຍຍິ່ງໃຫຍ່

ແລະຮຸ່ງເຮືອງທີ່ສຸດໃນສະຕະວັດທີ 17 ຫາ 18 ປົກຄອງປະເທດ ນໍເວ ແລະ ຟິນແລນ ປະເທດທາງຕາເວັນຕົກຂອງຣັດເຊຍ ແລະເອີຣົບກາງ

ຮອດຕົ້ນສັດຕະວັດທີ 19 ສະວີເດັນເສຍດິນແດນປົກຄອງທາງຕາເວັນອອກໃຫ້ຣັດເຊຍ ແລະໃຫ້ເອກະລາດແກ່ປະເທດ ນໍເວ ໃນປີ 1905, ຫລັງຈາກນັ້ນ

ປະເທດສະວີເດັນ ບໍ່ເຄີຍເຂົ້າຮ່ວມການຕໍ່ສູ້ ເຮັດເສິກສົງຄາມນຳປະເທດໃດໆ. ທັງສົງຄາມໂລກຄັ້ງທີນຶ່ງ ແລະສອງ ສະວີເດັນຢູ່ເປັນກາງບໍ່ເຂົ້າຮ່ວມຝ່າຍໃດ

ເຮັດໃຫ້ເສດຖະກິດຫມັ້ນຄົງ ແລະມີການພັດທະນາ ປະດິດສ້າງເຕັກໂນໂລຍີຢ່າງໄວວາ. ມາຮອດປັດຈຸບັນ ຖ້າກ່າວເຖິງປະເທດສະວີເດັນ

ຫລາຍຄົນກໍຕ້ອງຄຶດເຖິງ ຮາງວັນ Nobel, ລົດ Volvo, ໂທລະສັບ Ericsson ຍັງມີອີກຫລາຍຢ່າງທີ່ເຮົາອາດບໍ່ຮູ້ເຊັ່ນ: ໄມ້ຂີດໄຟ, ເຈ້ຍບັນຈຸເຄື່ອງດື່ມ

(TrtraPak), ຫົວໃຈທຽມ (Pacemaker), ອຸປະກອນຄອມພິວເຕີ້ເຊັ່ນ Mouse ແລະ Bluetooth.


ສະວີເດັນຍັງມີຊື່ສຽງ ເລື່ອງການເສຍພາສີ ເປັນປະເທດທີ່ເກັບພາສີສູງທີ່ສຸດໃນໂລກ ແລະມີພາສີຕໍ່ສິນຄ້າອຸປະໂພກ ບໍລິໂພກ ທຸກຊະນິດຫລາຍຫນ້ອຍ

ຂື້ນກັບຄວາມຈຳເປັນໃນຊີວິດປະຈຳວັນ ແລະຄວາມເປັນພິດຕໍ່ສິ່ງແວດລ້ອມ ເຊັ່ນ ນ້ຳມັນ (ລົດ) ເຊິ່ງມີພາສີຫລາຍກວ່າທົບເຄິ່ງຕໍ່ອາຫານການກິນ

ທີ່ເປັນຂອງຈຳເປັນຕໍ່ຊີວິດປະຈຳວັນ ເສຍພາສີຢ່າງຕ່ຳ 30 ສ່ວນຮ້ອຍ. ເຄື່ອງດື່ມ ປະເພດນ້ຳຫວານ ແລະເຫລົ້າ ມີພາສີສູງ

ໂດຍສະເພາະເຫລົ້າຕ້ອງເສຍພາສີຕາມຄວາມແຮງຂອງເຫລົ້າ.


ສະວີເດັນເປັນປະເທດທີ່ມີລະບົບການປົກຄອງແບບຣາຊາທິປະໄຕ ພາຍໃຕ້ລັດຖະທຳມະນູນ. ລັດຖະບານຄວບຄຸມຄຸ້ມຄອງ

ການເປັນຢູ່ຂອງປະຊາຊົນ ເງິນຈາກພາສີອຳນວຍໃຫ້ປະຊາຊົນໄດ້ຮັບການສຶກສາ ແລະສາທາລະນະສຸກ ຢ່າງທົ່ວເຖິງໂດຍບໍ່ມີການໃຊ້ຈ່າຍ

ນອກຈາກຄ່າທຳນຽມເທົ່ານັ້ນ.


ສິ່ງນຶ່ງທີ່ຫນ້າປະທັບໃຈໃນລັດຖະບານສະວີເດັນ ແມ່ນຄວາມຫ່ວງໃຍຕໍ່ຊາວຫນຸ່ມ ເຊິ່ງເປັນປະຊາກອນສ່ວນຫນ້ອຍ ແຕ່ແນ່ນອນເປັນສ່ວນທີ່ສຳ

ຄັນທີ່ສຸດຂອງປະເທດ. ຊາວຫນຸ່ມສະວີເດັນ ມີບັດປະຈຳໂຕໄດ້ຕອນອາຍຸ 16 (ແລ້ວແຕ່ຊະນິດລົດ) ມີສິດເລືອກຕັ້ງຕອນອາຍຸຄົບ 18 ປີ

ແລະມີສິດກິນເຫລົ້າໄດ້ ແຕ່ບໍ່ມີສິດຊື້ເຫລົ້າ ຫລືເຂົ້າຮ້ານເຫລົ້າ ສະຖານບັນເທີງໄດ້ຈົນກວ່າອາຍຸ 20 ປີ.


ຮ້ານຄ້າເຫລົ້າເປັນຂອງລັດຖະບານ (ບໍ່ມີຂອງເອກະຊົນ ຄືບ້ານເຮົາ) ເຊິ່ງ ໄຂ-ອັດ ເປັນເວລາປົກກະຕິ 9 ໂມງເຊົ້າ ຮອດ 6 ໂມງແລງ

ແລະບາງບ່ອນເທົ່ານັ້ນທີ່ໄຂວັນເສົາ (ເຄິ່ງມື້). ຍ້ອນເຫັນຜົນກະທົບຂອງເຫລົ້າຕໍ່ປະຊາກອນຂອງຊາດ ຈາກປະສົບການຫລາຍສິບປີກ່ອນ ຕົ້ນປີ 90

ເສດຖະກິດຕົກຕ່ຳ ມີຄົນຫວ່າງວຽກຫລາຍ ແລະເລີ່ມເປັນບັນຫາສັງຄົມ ໃນຄຸ້ມນຶ່ງມີຮ້ານຂາຍເຫລົ້າຂອງລັດພຽງຮ້ານດຽວ

ແຕ່ກໍເຮັດໃຫ້ຄົນເຂດນັ້ນຕິດເຫລົ້າຫລາຍ ເປັນເຫດໃຫ້ມີອາດຊະຍາກຳເກີດຂຶ້ນທຸກມື້ ດັ່ງນັ້ນ ລັດຖະບານຈຶ່ງ ຕັດສິນປິດຮ້ານຂາຍເຫລົ້າ

ເວລາຜ່ານໄປບໍ່ພໍທໍ່ໃດປີ ເຂດດັ່ງກ່າວກາຍເປັນເຂດທີ່ຫນ້າຢູ່ ແລະບໍ່ມີຂີ້ລັກປຸ້ນຈີ້ອີກເລີຍ. ຈາກປະສົບການນັ້ນ ລັດຖະບານຈຶ່ງໄດ້ເອົາໃຈໃສ່

ຈຳກັດຈຳນວນຮ້ານ ແລະເວລາໄຂບໍລິການ. ອີກກໍລະນີນຶ່ງ ທີ່ເກີດຂຶ້ນບໍ່ດົນມານີ້ ແມ່ນສະຖານບັນເທີງແຫ່ງນຶ່ງໃນໂຕເມືອງ ເຊິ່ງຂາຍເບຍລາຄາຖືກໂພດ

(ລາຄາປະມານ 40,000ກີິບຕໍ່ຈອກ ຈາກລາຄາປົກກະຕິແມ່ນປະມານ 100,000ກີບຕໍ່ຈອກ) ເຊິ່ງເຮັດໃຫ້ໄວຫນຸ່ມພາກັນໄປຮ້ານນັ້ນຫລາຍ

ແລະມີການເມົາອາລະວາດຕີກັນເລື້ອຍໆ ດັ່ງນັ້ນໃນເວລາບໍ່ດົນ ຮ້ານບັນເທີງແຫ່ງນັ້ນ ຈຶ່ງຖືກປິດ ຍ້ອນມີເຈດຕະນາເບື່ອເມົາຊາວຫນຸ່ມ.


ນອກນີ້ ເຂົາເຈົ້າກໍຍັງເອົາຈິງເອົາຈັງກັບການຂັບຂີ່ພາຫະນະ. ຫລາຍປະເທດພັດທະນາແລ້ວ ແລະກຳລັງພັດທະນາ

ມີກຳນົດປະລິມານສູງສຸດເຫລົ້າໃນເລືອດ (BAC) ຕໍ່ຜູ້ຂັບຂີ່ລົດ ເຊັ່ນ ອາເມຣິກາ, ອັງກິດ ແລະມາເລເຊຍ ມີກຳນົດ 0,08% (BAC) ບໍ່ກາຍ

ເບຍຫ້າກະປ໋ອງ, ປະເທດອົດສະຕາລີ ແລະໄທ ມີກຳນົດ 0,05% (BAC) ບໍ່ກາຍເບຍສອງກະປ໋ອງ, ແຕ່ສະວີເດັນ ມີກຳນົດພຽງແຕ່ 0,02% ເທົ່ານັ້ນ

ເຊິ່ງເທົ່າກັບເບຍເຄິ່ງກະປ໋ອງ. ການປັບໄຫມຄົນຂັບລົດ ທີ່ມີປະລິມານເຫລົ້າໃນເລືອດຫລາຍນັ້ນ ກໍຮຸນແຮງເຖິງຂັ້ນຕິດຄຸກ

ແລະເສຍສິດຂັບຂີ່ເປັນເວລາຫລາຍປີ. ນອກນີ້ບໍ່ແມ່ນແຕ່ລົດຈັກ ແລະລົດໃຫຍ່ເທົ່ານັ້ນ ຖ້າເມົາແລ້ວ ຂີ່ລົດຖີບ ກໍຍັງສາມາດຖືກຍຶດໃບຂັບຂີ່ລົດໃຫຍ່ໄດ້ອີກ

ຖ້າມີ. ເພາະເຂົາເຈົ້າເປັນຫ່ວງເປັນໄຍຊີວິດຄວາມປອດໄພ ຂອງຫມົດທຸກຄົນ.


ຢ່າງໃດກໍດີ ເຖິງວ່າລັດຖະບານຈະຄວບຄຸມ ແລະຄຸ້ມຄອງປະຊາຊົນເທົ່າໃດກໍຕາມ ແຕ່ຖ້າປວງຊົນບໍ່ໃຫ້ຄວາມຮ່ວມມື

ແລະບໍ່ເຫັນຄວາມສຳຄັນຂອງກົດລະບຽບ ກົດຫມາຍຈະຫນັກແຫນ້ນທໍ່ໃດ ກໍບໍ່ສາມາດລ້ອມໄວ້ໄດ້ຫມົດ. ຄົນທີ່ມີການສຶກສາ ມີຄວາມສຳນຶກ

ຮູ້ຮັບຜິດຊອບທັງຊີວິດຕົນເອງແລະຜູ້ອື່ນ ບໍ່ຈຳເປັນຕ້ອງເອົາກົດຫມາຍມາບັງຄັບ. ເພາະຄຶດໃນອີກແງ່ນຶ່ງ ບ່ອນໃດທີ່ມີກົດລະບຽບຫລາຍ

ກໍສະທ້ອນໃຫ້ເຫັນວ່າບ່ອນນັ້ນ ທີຄົນເຮັດຜິດກົດຫມາຍຫລາຍ ຄົນທີ່ເຮັດຜິດກົດຫມາຍນັ້ນສະແດງວ່າຄົນຜູ່ນັ້ນ ບໍ່ມີສາມັນສຳນຶກ, ບໍ່ມີວັດທະນະທຳ

ບໍ່ມີຄວາມເປັນມະນຸດຫລົງເຫລືອຢູ່.

Friday, November 28, 2008

ແກ໋ງໄວຫນຸ່ມອາລະວາດຕີກັນ ເສຍຊີວິດ 1 ຄົນ

ຂ່າວຈາກຫນັງສືພິມລາວພັດທະນາ ສະບັບວັນທີ 25 ພະຈິກ 2008 ໃຫ້ຮູ້ວ່າ ປກສ ເມືອງນາຊາຍທອງ ນະຄອນຫລວງວຽງຈັນ ໃຫ້ຂໍ້ມູນມາວ່າ: ເຫດການສະເທືອນຂວັນດັ່ງກ່າວໄດ້ເກີດຂຶ້ນໃນເວລາເກືອບທ່ຽງຄືນຂອງວັນທີ 16 ພະຈິກ ທີ່ຜ່ານມາ ຢູ່ຮ້ານອາຫານນ້ຳນຶ່ງ ບ້ານໂພນຄຳ ເມືອງນາຊາຍທອງ, ເມື່ອແກ໋ງໄວຫນຸ່ມຈາກບ້ານອີ່ໄລຈຳນວນ 7 ຄົນ ແລະແກ໋ງໄວຫນຸ່ມຈາກບ້ານໂພນມ່ວງ ປະມານ 10 ຄົນ ເຊິ່ງພວມນັ່ງດື່ມເບຍຢູ່ຮ້ານດັ່ງກ່າວດ້ວຍຄວາມມຶນເມົາ ແລ້ວເກີດຜິດຖຽງກັນຮຸນແຮງ ເປັນເຫດໃຫ້ມີການປະທະກັນ ເຊິ່ງທັງສອງຝ່າຍຕ່າງໃຊ້່ງ້າວເປັນອາວຸດເຂົ້າຟັນກັນ,​ຝ່າຍໄວຫນຸ່ມບ້ານໂພນມ່ວງໃຊ້ງ້າວ ຟັນເຂົ້າກະໂຫລກຫົວຂອງ ທ້າວປານ ອາຍຸ 20 ປີ ຢູ່ບ້ານອີ່ໄລໃຕ້ຈົນເສຍຊີວິດຄາທີ່ ແລະຝ່າຍໄວຫນຸ່ມບ້ານອີ່ໄລກໍໃຊ້ງ້າວຟັນຖືກຫົວທ້າວ ໂບ້ ຈົນເຈັບສາຫັດ.

ປັດຈຸບັນເຈົ້າຫນ້່າທີ່ພວມນຳຈັບຫົວໂປ່ແກ໋ງໄວຫນຸ່ມດັ່ງກ່າວ ທີ່ພວມຫລົບຫນີເພື່ອນຳມາດຳເນີນຄະດີໃຫ້ໄດ້.

ນອກນີ້ເຈົ້າຫນ້າທີ່ ປກສ ເມືອງນາຊາຍທອງ ຍັງໃຫ້ຮູ້ຕື່ມວ່າ: ການອາລະວາດຕີກັນຂອງຂະບວນ ແກ໋ງໄວຫນຸ່ມ ຕາມຮ້ານກິນດື່ມ ນັບມ໋ື້ນັບຮຸນແຮງຂຶ້ນ ເນື່ອງຈາກບັນດາຮ້ານອາຫານ ກິນດື່ມເຫລົ່ານັ້ນຈຳນວນນຶ່ງ ດຳເນີນກິດຈະການໂດຍບໍໄດ້ຮັບການອະນຸຍາດ ຈຶ່ງເຮັດໃຫ້ການຄຸ້ມຄອງ ແລະກວດກາພົບຄວາມຫຍຸ້ງຍາກ.

ນັບແຕ່ບຸນນະມັດສະການພະທາດຫລວງເປັນຕົ້ນມາ ສະເພາະບ້ານສົງເປືອຍ ເກີດມີການອາລະວາດຕີກັນເຖິງ 3 ເທື່ອ ຈົນເຮັດໃຫ້ອຳນາດການປົກຄອງເມືອງສັ່ງປິດຮ້ານກິນດື່ມເຫລົ່ານັ້ນມາແລ້ວ 2 ຮ້ານ ແລະອີກຈຳນວນນຶ່ງ ແມ່ນໄດ້ເອີ້ນເຈົ້າຂອງຮ້ານມາຕັກເຕືອນ ແລະສຶກສາອົບຮົມ.

ໂຈນຫັກຫລັງໂຈນ

ຕາມຂ່າວຈາກ ຫນັງສືພິມ ລາວພັດທະນາ ສະບັບວັນທີ 25 ພະຈິກ 2008 ທາງເຈົ້າຫນ້າທີ່ ປກສ ເມືອງຈັນທະບູລີ ເປີດເຜີຍວ່າ: ຍ້ອນໂຈນ ຈຶ່ງສາມາດຈັບໂຈນໄດ້.

ເຫດການດັ່ງກ່າວເກີດຂຶ້ນເມື່ອຕົ້ນເດືອນຕຸລາທີ່ຜ່ານມາ, ຜູ້ເປັນໂຈນທັງສອງຄື: ທ້າວ ອັກສອນສະຫວັນ ອາຍຸ 20 ປີ ຢູ່ບ້ານສີດຳດວນ ເມືອງຈັນທະບູລີ ນະຄອນຫລວງວຽງຈັນ ແລະ ທ້າວ ແບ໋ງ ອາຍຸ 26 ປີ ຢູ່ບ້ານນາຄອງ ເມືອງທຸລະຄົມ ແຂວງວຽງຈັນ ທີ່ມາພັກເຊົາຢູ່ບ້ານສີບຸນເຮືອງ, ທັງສອງໄດ້ປຶກສາຫາລື ວາງແຜນກັນ ເຂົ້າໄປລັກເຄື່ອງໃນຮ້ານ ຄອມພິວເຕີ້ແຫ່ງນຶ່ງ ຢູ່ບ້ານສະຫວ່າງເມືອງຈັນທະບູລີ.

ເມື່ອຮູ້ເປົ້າຫມາຍ ແລະວາງແຜນລະອຽດແລ້ວ ທ້າວອັກສອນສະຫວັນ ເລີຍຫັກຫລັງຫມູ່ ແທນທີ່ຈະໄປລັກພ້ອມກັນ ຕົນຊ້ຳຜັດສວຍໂອກາດລົງມືກ່ອນ ເຊິ່ງໄດ້ລັກເອົາ ຄອມພິວເຕີ້ຕັ້ງໂຕະ 1 ຫນ່ວຍ, Laptop 1 ຫນ່ວຍ, ກ້ອງຖ່າຍຮູບ Digital 1 ຫນ່ວຍ: Harddisk 1 ອັນ, ໂທລະສັບມືຖື 2 ຫນ່ວຍ ແລະເງິນສົດ 15,600 ບາດ. ເມື່ອທ້າວ ແບ໋ງ ຮູ້ເລື່ອງດັ່ງກ່າວກໍເກີດໂມໂຫ ທີ່ຫມູ່ຫັກຫລັງ ເລີຍໂທໄປຫາເຈົ້າຂອງຮ້ານເພື່ອຂູ່ເອົາເງິນ ໂດຍບອກເຈົ້າຂອງວ່າ ຕົນຮູ້ລາຍລະອຽດວ່າໃຜລັກເຄື່ອງ ຖ້າຢາກຮູ້ໃຫ້ເອົາເງິນມາໃຫ້ ຈຳນວນ 5000 ບາດ ແລ້ວຈະບອກເລື່ອງທັງຫມົດ.

ເມື່ອເປັນເຊັ່ນນັ້ນ ທາງເຈົ້າຂອງຮ້ານ ຈຶ່ງໄດ້ໂທລະສັບແຈ້ງເຈົ້າຫນ້າທີ່ຕຳຫລວດ ເພື່ອສືບຫາຄົນຮ້າຍລາຍດັ່ງກ່າວ, ຈາກນັ້ນເຈົ້າຫນ້າທີ່ກໍສາມາດນຳຈັບ ທ້າວອັກສອນສະຫວັນ ມາດຳເນີນຄະດີຕາມກົດຫມາຍບ້ານເມືອງໄດ້ ແລະຕົກມາຮອດກາງເດືອນຕຸລາ ຈຶ່ງສາມາດນຳຈັບທ້າວແບ໋ງ ແລະພັກພວກອີກສອງຄົນໄດ້ ແລະພວກກ່ຽວກໍໄດ້ສາລະພາບວ່າ ນອກຈາກຮ້ານນີ້ແລ້ວ ຫວ່າງເດືອນສິງຫາທີ່ຜ່ານມາກໍໄດ້ລັກເຄື່ອງຢູ່ຮ້ານຄອມພິວເຕີ້ ອີກແຫ່ງນຶ່ງມາກ່ອນແລ້ວ.

ປັດຈຸບັນທາງເຈົ້າຫນ້່າທີ່ພວມດຳເນີນຄະດີກັບພວກກ່ຽວຕາມລະບຽບກົດຫມາຍ ສ່ວນເຄື່ອງທີ່ລັກມາ ແມ່ນໄດ້ມອບໃຫ້ທາງຮ້ານຄືນ ເຊິ່ງເຄື່ອງທັງຫມົດແມ່ນຍັງຢູ່ຄົບ ເພາະທ້າວອັກສອນສະຫວັນບໍ່ທັນໄດ້ເອົາໄປຂາຍເທື່ອ ຍັງເຊື່ອງໄວ້ຢູ່ພາຍໃນເຮືອນຂອງຕົນເອງ ແຕ່ເງິນຈຳນວນ 15,600 ບາດ ແມ່ນໃຊ້ຈ່າຍຫມົດແລ້ວ.

ນີ້ລະຄວາມໂລບມາກໂລພາ ອິດສາບັງບຽດ ສຸດທ້າຍກໍຖືກຈັບໄດ້ ເຮັດຜິດຍ່ອມຫນີບໍ່ລອດ.

Saturday, November 22, 2008

ພະຍາດອັກເສບຕັບລະບາດຢູ່ແຂວງວຽງຈັນ ພົບຜູ້ປ່ວຍ 200 ກວ່າຄົນ

ຕາມຂໍ້ມູນຈາກ ຫນັງສືພິມ ເສດຖະກິດ-ສັງຄົມ ສະບັບວັນທີ 21/11/08

ທ່ານ ນາງ ດຣ. ຈັນຫອມ ຄອນສະຫວັນ ຫົວຫນ້າຂະແຫນງເດັກຕຶກພາຍໃນ ທັງເປັນຜູ່ຮັບຜິດຊອບວຽກງານ ລະບາດວິທະຍາຂອງໂຮງຫມໍແຂວງວຽງຈັນ ໄດ້ລາຍງານໃຫ້ຮູ້ວ່າ ນັບແຕ່ວັນທີ 11-16 ຕຸລາ 2008 ທີ່ຜ່ານມາ ໄດ້ມີຄົນເຈັບເຂົ້າມາກວດພະຍາດ ແລະປິ່ນປົວ ເນື່ອງຈາກເປັນພະຍາດອັກເສບຕັບ A ຢູ່ໂຮງຫມໍແຂວງວຽງຈັນເຖິງ 200 ກວ່າຄົນ ເຊິ່ງການລະບາດຂອງພະຍາດດັ່ງກ່າວໃນຄັ້ງນີ້ ກວມເອົາ 7 ເມືອງຄື:

- ເມື່ອງວຽງຄຳ 82 ກໍລະນີ.
- ເມືອງແກ້່ວອຸດົມ 54 ກໍລະນີ.
- ເມືອງໂພນໂຮງ 42 ກໍລະນີ.
- ເມືອງທຸລະຄົມ 30 ກໍລະນີ.
- ເມືອງຫີນເຫີບ 4 ກໍລະນີ.
- ເມືອງວັງວຽງ 1 ກໍລະນີ.
- ເມືອງເຟືອງ (ບໍ່ຮູ້ໂຕເລກແນ່ນອນ).

ປະຈຸບັນຍັງບໍ່ມີລາຍງານວ່າມີຜູ້ເສຍຊີວິດຍ້ອນ ພະຍາດດັ່ງກ່າວເທື່ອ ເຊິ່ງຜູ້ເຈັບເປັນສ່ວນໃຫຍ່ແມ່ນຢູ່ໃນເກນອາຍຸ 10-20 ປີ ຮອງລົງມາແມ່ນ ຕ່ຳກວ່າ 10 ປີ ແລະສູງກວ່າ 20 ປີມີຈຳນວນຫນ້ອຍນຶ່ງ.

ສາເຫດຂອງການແຜ່ລະບາດຄັ້ງນີ້ ມາຈາກນ້ຳ ແລະອາຫານບໍ່ສະອາດທີ່ປົນເປື້ອນພະຍາດດັ່ງກ່າວ ເຊິ່ງຕິດຕໍ່ຈາກການໃຊ້ພາຊະນະຮ່ວມກັນ ເຊັ່ນຖ້ວຍບ່ວງຈອກ ແລະວິດຖ່າຍທີ່ບໍ່ສະອາດ.

ອາການຂອງຄົນທີ່ເປັນພະຍາດຕັບອັກເສບເອ ແມ່ນມີອາການລ່າເຫລືອງຜິດປົກກະຕິ, ນ້ຳປັດສະວະມີສີເຂັ້ມ, ເມື່ອຍເພຍ, ປວດຮາກ ແລະກິນເຂົ້າບໍ່ແຊບ, ເຈັບທ້ອງ, ເຈັບຈຸກຢູ່ທ້ອງເບື້ອງຂວາ. ທ່ານນາງ ດຣ. ຈັນຫອມ ຄອນສະຫວັນ ໄດ້ແນະນຳໃຫ້ປະຊາຊົນໃນເຂດດັ່ງກ່າວຈົ່ງເພີ່ມຄວາມລະວັງໃນການກິນຢູ່ ຕ້ອງກິນອາຫານສະອາດ ຕົ້ມນ້ຳໃຫ້ສຸກ ແລະໃຊ້ວິດຖ່າຍ ສຳຄັນລ້າງມືໃຫ້ສະອາດທຸກຄັ້ງ ແລະຮັກສາອະນາໄມ ພາຊະນະໃສ່ຂອງກິນ.

ສະບາຍດີ

ສະບາຍດີພໍ່ແມ່ພີ່ນ້ອງ ບໍ່ໄດ້ມາວົນມາສົນນຳ ບລ໋ອກນີ້ດົນແລ້ວ
ພໍດີຊ່ວງນີ້ເຫັນໃຜບາງຄົນເພິ່ນຂຽນ ບລ໋ອກລະໄປກ໋ອບຂອງໃຜມາບຸ 555 ກະເລີຍຄຶດຢາກຂຽນອີກ
ແຕ່ຄືສິບໍ່ຂຽນຄື a8 ຫລື ອາວພະນົມສິນດອກ ຈະເນັ້ນຂ່າວສານບ້ານເມືອງໂດຍສະເພາະເລີຍສະ
ກະອາດມີເລື່ອງອື່ນໆມາປົນນຳ ເອົາເປັນວ່າໃຜຢາກຮູ້ຂ່າວສານບ້ານເມືອງລາວເຮົາ
ກະສາມາດເຂົ້າມາອ່ານມາປະກອບຄຳເຫັນ ຫລືຢາກເປັນ ຄົນຂຽນຂ່າວລົງຊ່ອຍ
ກໍສົ່ງເມລມາໄດ້ເລີຍ ຊິໃຫ້ປະກອບສ່ວນຊ່ອຍເນາະ.

ຂ່າວຫລັກໆກໍຄືສິອາໄສ ຈາກຫນັງສືພິມ ແລະບາງອັນທີ່ຫາມາເອງ
ທັງນີ້ທັງນັ້ນ ກໍເພື່ອໃຫ້ຄົນມັກຫລິ້ນອິນເຕີເນັດໄດ້ຮູ້ຄວາມເປັນໄປຂອງບ້ານເມືອງຫລາຍຂຶ້ນ
ມີເຫດການຫຍັງໃຫມ່ໆເກີດຂຶ້ນ ມີປະກົດການຫຍໍ້ທໍ້ຫຍັງໃນສັງຄົມ
ໃຫ້ທຸກຄົນອ່ານແລ້ວປະກອບສ່ວນຊ່ອຍກັນສ້າງສາສັງຄົມລາວໃຫ້ດີຂຶ້ນເລື້ອຍ
ຂອບໃຈເທົ່ານີ້ລະ ຂຽນຫລາຍຍາວ